【誰都可發光 只要找對地方】
麥路同行。起動於此
上星期六(28/6)，麥理浩培訓及就業發展為ERB畢業學員舉辦咗一場畢業典禮，現場匯聚過百名畢業生、導師及就業發展綜合服務同工外，我哋仲邀請咗多位畢業學員，展現佢哋嘅不同技能，猶如一個少型跨界別行業交流嘉年華，大家都非常enjoy，於歡笑聲中渡過一個滿載成果嘅週末。
學員技能展演 點燃全場熱情
有別於以往，今次大會特意加入更多「畢業學員」元素。首次邀請幾位畢業學員加入成為活動籌委成員，分別有兩位大會司儀：完成<社福活動助理基礎證書>嘅Kimmy及完成<寵物美容助理、寵物護理員及寵物寄養實務基礎證書>課程嘅魷魚；於活動當日，為我哋即席示範炎夏透心涼嘅「百香果夏日特飲」，<手搖茶類飲品製作基礎證書>畢業同學(周媽媽及囡囡淇淇)。仲有為我哋準備養生「金羅漢果菊花茶」嘅<中醫診所助理>課程嘅畢業學員(阿保及寶英)及活動籌委 - <社福>課程畢業同學Karen及Ernest。
除咗以上嘅畢業學員外，我哋誠意邀請四位畢業學員(銀姿、珈儀、Karen、詠藍)，親身主持「創業分享庫」，帶同自己手創嘅手工藝品，與學員分享成功創業嘅經過。
重溫當日活動精彩片段，即Click入去以下連結一齊睇片啦 ~ ERB畢業禮2024-25
滙聚江湖高手 薪火相傳畢生造藝
今次以「江湖」為主題(特別要多謝寵物美容助理基礎證書(青培)畢業學員 – 蔡咏芝)為大會設計一系列嘅插畫)，就業發展綜合服務 - 服務協調主任曾淑儀致辭時表示，衷心感謝各導師們「將畢生本領傾囊相授，讓學員帶著功夫下山闖蕩江湖」。多位導師獲邀分享最新行業前景，如：寵物美容護理課程導師(陳秀君)、標準保安及物業管理課程導師(黃南喬)等，當中教授個人素樣嘅梁志光導師提到：「畢業並唔係等如結束，剛好係人生新一章嘅開始，就好似句Slogan一樣『起動於此』。」 
認清自我潛能 成功踏上轉型路
活動當日，兩位畢業學員銀姿(園藝)及詠藍(花藝)分享成功創業心得，其中同學詠藍第一句就提到，令佢開竅嘅陳夏萍導師：「我一直對花藝好有興趣，參加咗Miss Chan嘅花藝班之後，開發咗我嘅五感，令我可充分發揮花藝上嘅層次技術，我仲有機會一步步去創業，發展我嘅花藝事業，最近仲成為中心導師添，我真係好衷心多謝佢呀！」
面對就業環境改變 肯“轉”則通
正如曾主任表示：「嚟緊我哋會增設更多唔同範疇嘅ERB課程，希望可以緊貼市場需求，應對瞬息萬變嘅就業環境。各位同學無論係想探索新興趣，抑或係尋找明確嘅職涯發展方向，都可以透過進修，提升個人技能，開拓更多可能性。」 麥理浩培訓及就業發展不但注重技能培訓，更致力協助學員順利投入相關行業。曾主任強調：「我哋嘅就業服務會全程支援，幫助學員於掌握新技能後，成功踏足相關行業，將興趣融合專長，轉化為事業動力。」
＜給左右為難的你＞
如果你正處於職業思考期，或者休息期間正規劃未來人生方向，不妨考慮一下ERB培訓課程，等自己嘗試接觸唔同領域嘅新技能，發掘更多嘅可能性。
無論想創業、轉換跑道，抑或係為事業注入新動力，我哋各就業發展綜合服務中心(葵涌、荃灣、青衣及太子寵愛軒)都能為你提供一個"起步"嘅契機。
希望好快可以喺培訓中心見到你，一齊開啟屬於你嘅新篇章！
無論人生咩階段
肯起動就係起點
一齊「起動於此」
足本畢業禮花絮片段製作需時，稍後再同大家分享啦！
#發掘自己可能性唔好吓吓sayno
#轉角遇到新機會
#就憑一個信念開創新景象
#畢業學員成功創業就係好例子
#小編做完活動又要起動於此
#不停步先會不斷進步
^以上文字轉載自FB貼文(2025-07-03)